دارينا

ألقى نظرة سريعة على القائمة .. ركن خاص بأنواع القهوة التى تحمل أسماء بعض أغانى فيروز المفضلة لدى

صباح و مسا

أنا عندى حنين

حبيتك تنسيت النوم

و لم يستطع أن يدارى ضحكته عندما وصل للقهوة التى تحمل حبيتك بالصيف .. ثم رأى بجانبها صنف آخر من القهوة يحمل اسم حبيتك بالشتى

و ظللت أنا أتابعه من خلف نظارتى الطبية التى أقرأ بها الجريدة .. فى الواقع نظرى ليس ضعيف بالمرة .. و لكنها تعطى طابعا جدياً لوجهى يجعلنى أكثر وقاراً .. و تعطينى سناً أكبر من سنى حتى يليق بى منصبى فى المقهى

هكذا كنت أظن ذلك إلى أن أشار لى ذلك الفتى الذى يبدو أنه لم يتجاوز نصف عقده الثالث .. يبدو من هيئته و تصفيفة شعره أنه ما يزال بوهج أوائل العشرينات

ربما يحسبنى النادلة ؟؟

بوقار تام .. تحركت إليه ببطء شديد .. و تعمدت أن ألقى أوامراً هنا و هناك للنادلات قبل أن أصل لطاولته حتى يستشف هو من أكون دون أنا أضطر أنا لإخباره

لو سمحتى .. هو ايه ده ؟؟

و أشار لقائمة الأغانى .. أقصد قائمة المشروبات

دى أنواع قهوة .. احنا هنا بنعمل قهوة على أسماء الأغانى

ليه ؟؟؟

هو ايه اللى ليه ؟؟؟ .. بنخترع .. ماهو من حق كل مواطن إنه يخترع زى ماهو عاوز يعنى

يعنى دى أنواع معروفة و انتو غيرتو أسماءها يعنى ؟؟

لا .. دى أنواع إحنا اللى مظبطينها .. ماحدش تانى بيعملها غيرنا

و كل نوع مرتبط باسم الغنوة يعنى ؟؟ .. يعنى الاسم له علاقه بنوع القهوة و لا ده مجرد اسم و خلاص؟

انت بتسأل كل ده ليه ؟؟ .. انت ناوى تطلب حاجة يعنى محددة و لا بتسأل و خلاص و بعدين هاتقوم تمشى ؟؟

لا بجد عاوز اعرف .. الحكاية مثيرة للاهتمام

اهااااااااااااا .. طب يا سيدى .. عشان اريحك يعنى .. كل نوع من دول مرتبط باسم الغنوة بتاعته .. سواء بمعناها أو بالحالة بتاعتها

طب ممكن سؤال ؟

اتفضل .. بس يارب يكون آخر سؤال قبل ما تقولى الاوردر بتاع حضرتك

دارينا.. عاوز اعرف بس هى ايه ؟ .. يعنى بتتعمل ازاى ؟؟

انا ممكن اقولك المكونات لكن ماقدرش اقولك الصنعه .. بس دارينا بالذات انا متأكده أنها هاتعجبك .. بص يعنى يا سيدى هى بتتعمل من نوع معين من البن اليمنى داخل فيها شوية قرفة و كراميل .. بتتغلى بطريقة معينة و لمدة معينة .. و الكريمة زى ما تحب .. و ممكن تضيف شيكولاتة أو لا .. زى ماتحب برده .. بس لازم تقولى السكر بتاعك قبلها عشان السكر بيتقلب فيها قبل ماحطها عالنار .. فهمت حاجة ؟؟

لاحظت أنه لا يستمع .. فقط هو يرقب حركاات يدى و أنا أصف .. صوتى .. و عيونى من خلف زجاج النظارة .. يلقى ابتسامة لى بين كلمة و أخرى و يرقب وقعها على سرعة حركة جفنى

لا أدرى كيف جلست على الكرسى الذى سحبه لى و أنا مستغرقة فى الوصف و الحديث .. فقط ظللت مستغرقة فى وصف أنواع القهوة الأخرى .. أريد أن أعرف نوعه المفضل .. و لكنه لا يبدى إعجابه بأى نوع عن آخر

جعلنى استغرق فى وصف الصنع .. كأننى استعرض له فنى .. و قد لاحظت أننى بدأت أحاول جاهدة لفت انتباهه إلى .. لأنه بالفعل بدأ يروق لى .. و أنا نادراً ما يحدث معى ذلك

لا أدرى كم من الوقت مضى على حديثنا .. كان يستمع باهتمام شديد .. يبتسم بعذوبة متناهية .. و يدون بعض من الكلمات فى مفكرة صغيرة .. و ظللت أنا اتصنع عدم الاهتمام بما يكتب ..و لكن كل ما خطر لى وقتها أنه ربما كان كاتب أو شاعر .. جاء مقهانا ليستوحى من جوه المميز شئ ما .. ربما سيكتب عنى أنا تحديداً .. و كلما استولت على تلك الأفكار كلما زدت فى إشراقتى بالحديث .. و كنت قد خلعت نظارتى لأبدو أكثر جاذبية .. ووضعت ساقاً على ساق كى أبدو أيضاً أكثر ثقة

و هكذا بعد وقت لم أحسبه من الحديث وجدته يلملم أشياءه و يهم بالرحيل .. تعجبت لأنه لم يطلب شيئاً مما جعلنى استغرق فى شرحه .. ثم رأيته يتمتم بينه و بين نفسه أنه بالتأكيد دارينا .. تعجبت كثيراً فلم استطع منع نفسى من التساؤل ماهو الذى بالتأكيد دارينا .. و لكنه ضحك ضحكة ذات معنى .. ثم قام ليرحل

طب يعنى انت ماطلبتش اى حاجة كده ؟؟ ينفع كده ؟؟ و لا مشاريبنا مش عاجباك ؟؟

لا مش القصد طبعا .. بس أنا أساسا مابحبش القهوة .. لكن مراتى هى اللى بتحبها أوى و مضيعة كل وقتها و فلوسها وفلوسى على القهوة بتاعتكو دى .. و أنا بصراحة مابقيتش عارف أتصرف معاها إزاى .. معلش بقا اضطريت آجى أعرف أنتو بتعملو ايه هنا عشان أجرب أنا اعملهولها .. و أهو نوفر شوية بدل الفلوس اللى عماله تطير فى الهوا على كلام فاضى دى

و هكذا ألقى بكلماته و اختفى بلمح البصر .. تاركاً على وجهى أغبى تعبير يمكن أن يتركه رجل على وجه امرأة فى الكون